ਇਜ਼ਰਾਈਲ ਨੇ ਕੀਤੇ ਸੀਰੀਆ ਤੇ 250 ਥਾਵਾਂ `ਤੇ ਹਮਲੇ

by Jasbeer Singh
December 10, 2024

ਇਜ਼ਰਾਈਲ ਨੇ ਕੀਤੇ ਸੀਰੀਆ ਤੇ 250 ਥਾਵਾਂ `ਤੇ ਹਮਲੇ ਦਮਿਸ਼ਕ : ਗਾਜ਼ਾ ਤੇ ਲਿਬਨਾਨ `ਚ ਤਬਾਹੀ ਮਚਾਉਣ ਤੋਂ ਬਾਅਦ ਇਜ਼ਰਾਈਲ ਨੇ ਹੁਣ ਸੀਰੀਆ `ਚ ਕਹਿਰ ਢਾਹੁਣਾ ਸ਼ੁਰੂ ਕਰ ਦਿੱਤਾ ਹੈ । ਇਜ਼ਰਾਈਲ ਨੇ ਸੀਰੀਆ `ਤੇ ਇਤਿਹਾਸ ਦਾ ਸਭ ਤੋਂ ਵੱਡਾ ਹਮਲਾ ਕੀਤਾ ਹੈ । ਬਸ਼ਰ ਅਲ-ਅਸਦ ਦੇ ਦੇਸ਼ ਤੋਂ ਭੱਜਣ ਮਗਰੋਂ ਇਜ਼ਰਾਈਲੀ ਹਵਾਈ ਫ਼ੌਜ ਨੇ ਪੂਰੇ ਸੀਰੀਆ `ਚ ਭਿਅੰਕਰ ਬੰਬਾਰੀ ਕੀਤੀ ਹੈ । ਕਰੀਬ 250 ਹਵਾਈ ਹਮਲਿਆਂ ਨੇ ਸੀਰੀਆ ਦੇ ਫੌਜੀ ਟਿਕਾਣਿਆਂ ਨੂੰ ਤਬਾਹ ਕਰ ਦਿੱਤਾ ਹੈ । ਇਜ਼ਰਾਈਲ ਦੀ ਪੈਦਲ ਫ਼ੌਜ ਵੀ ਸੀਰੀਆ ਵਿੱਚ ਦਾਖ਼ਲ ਹੋ ਗਈ ਹੈ । ਇਜ਼ਰਾਈਲ ਦੇ ਸੈਨਿਕ ਸੀਰੀਆ ਦੀ ਰਾਜਧਾਨੀ ਦਮਿਸ਼ਕ ਤੋਂ ਕਰੀਬ 25 ਕਿਲੋਮੀਟਰ ਦੂਰ ਦੱਖਣ-ਪੱਛਮੀ ਖੇਤਰ `ਚ ਪਹੁੰਚ ਗਏ ਹਨ । ਰਾਇਟਰਜ਼ ਨੇ ਸੀਰੀਆ ਦੇ ਇਕ ਸੁਰੱਖਿਆ ਸੂਤਰ ਦੇ ਹਵਾਲੇ ਨਾਲ ਕਿਹਾ ਕਿ ਇਜ਼ਰਾਈਲੀ ਫੌਜ ਕਤਾਨਾ ਪਹੁੰਚ ਗਈ ਹੈ । ਇਹ ਇਲਾਕਾ ਸੀਰੀਆ ਦੇ ਗੋਲਾਨ ਹਾਈਟਸ ਤੋਂ ਕਰੀਬ 10 ਕਿਲੋਮੀਟਰ ਦੂਰ ਹੈ । ਅਲ ਜਜ਼ੀਰਾ ਨੇ ਆਪਣੀ ਰਿਪੋਰਟ `ਚ ਕਿਹਾ ਹੈ ਕਿ ਇਜ਼ਰਾਈਲ ਨੇ ਇਤਿਹਾਸ `ਚ ਸੀਰੀਆ `ਤੇ ਸਭ ਤੋਂ ਵੱਡਾ ਹਮਲਾ ਕੀਤਾ ਹੈ । ਇਜ਼ਰਾਈਲ ਨੇ ਹਵਾਈ ਹਮਲਿਆਂ `ਚ ਸੀਰੀਆਈ ਫੌਜ ਦੇ ਤਿੰਨ ਏਅਰਬੇਸ ਤੇ ਹੋਰ ਰਣਨੀਤਕ ਟਿਕਾਣਿਆਂ ਨੂੰ ਤਬਾਹ ਕਰ ਦਿੱਤਾ ਹੈ । ਇੱਕ ਇਜ਼ਰਾਈਲੀ ਸੁਰੱਖਿਆ ਸੂਤਰ ਨੇ ਇਜ਼ਰਾਈਲੀ ਆਰਮੀ ਰੇਡੀਓ ਨੂੰ ਦੱਸਿਆ ਕਿ ਇਜ਼ਰਾਈਲੀ ਬਲਾਂ ਨੇ ਸੀਰੀਆ `ਚ 250 ਤੋਂ ਵੱਧ ਟਿਕਾਣਿਆਂ `ਤੇ ਹਮਲਾ ਕੀਤਾ ਹੈ । ਇਸ ਵਿਚ ਕਿਹਾ ਗਿਆ ਹੈ ਕਿ ਇਹ ਦੇਸ਼ ਦੀ ਹਵਾਈ ਫ਼ੌਜ ਦੇ ਇਤਿਹਾਸ ਵਿੱਚ ਸਭ ਤੋਂ ਵੱਡੇ ਹਮਲਿਆਂ `ਚੋਂ ਇਕ ਹੈ । ਇਜ਼ਰਾਈਲ ਸੀਰੀਆ ਦੀ ਰਾਜਧਾਨੀ ਦਮਿਸ਼ਕ `ਤੇ ਲਗਾਤਾਰ ਹਵਾਈ ਹਮਲੇ ਕਰ ਰਿਹਾ ਹੈ । ਹਮਲੇ ਤੋਂ ਬਾਅਦ ਦਮਿਸ਼ਕ `ਚ ਕਈ ਥਾਵਾਂ `ਤੇ ਅੱਗ ਵੀ ਲੱਗ ਗਈ ।