ਅਮਰੀਕਾ `ਚ ਹੋਇਆ ਭਾਰਤੀ ਮੂਲ ਦੇ ਨੌਜਵਾਨ ਦਾ ਕਤਲ

by Jasbeer Singh
June 8, 2026

ਅਮਰੀਕਾ `ਚ ਹੋਇਆ ਭਾਰਤੀ ਮੂਲ ਦੇ ਨੌਜਵਾਨ ਦਾ ਕਤਲ

ਹੈਦਰਾਬਾਦ, 8 ਜੂਨ 2026 : ਭਾਰਤ ਦੇਸ ਦੇ ਸੂਬੇ ਤੇਲੰਗਾਨਾ (Telangana) ਦੇ ਸ਼ਹਿਰ ਹੈਦਰਾਬਾਦ ਦੇ ਵਸਨੀਕ ਇਕ ਨੌਜਵਾਨ ਦਾ ਅਮਰੀਕਾ ਵਿਖੇ ਕਤਲ (Murder) ਕਰ ਦਿੱਤੇ ਜਾਣ ਦਾ ਸਮਾਚਾਰ ਪ੍ਰਾਪਤ ਹੋਇਆ ਹੈ ।

ਪਰਿਵਾਰ ਨੇ ਇਨਸਾਫ਼ ਦੀ ਮੰਗ ਕੀਤੀ

ਹੈਦਰਾਬਾਦ ਦੇ ਇਕ 28 ਸਾਲਾ ਨੌਜਵਾਨ ਦਾ ਅਮਰੀਕਾ `ਚ ਪੀਜ਼ਾ ਪਹੁੰਚਾਉਣ ਦੌਰਾਨ ਗੋਲੀ ਮਾਰ ਕੇ ਕਤਲ ਕਰ ਦਿੱਤਾ ਗਿਆ । ਪਰਿਵਾਰ ਨੂੰ ਇੱਥੇ ਮਿਲੀ ਜਾਣਕਾਰੀ ਅਨੁਸਾਰ ਇਹ ਘਟਨਾ 5 ਜੂਨ ਅਮਰੀਕਾ ਫਿਲਾਡੇਲਫੀਆ `ਚ ਵਾਪਰੀ । ਨੌਜਵਾਨ ਦਾ ਪਰਿਵਾਰ ਜੋ ਹੈਦਰਾਬਾਦ ਨੇੜੇ ਗੁੰਡਲਾਪੋਚੰਪਲੀ ਇਲਾਕੇ `ਚ ਰਹਿੰਦਾ ਹੈ, ਨੇ ਇਨਸਾਫ ਦੀ ਮੰਗ ਕੀਤੀ ਹੈ ।

ਕੌਣ ਹੈ ਇਹ ਨੌਜਵਾਨ

ਨਿਊਯਾਰਕ `ਚ ਭਾਰਤੀ ਕੌਂਸਲੇਟ ਨੇ ਸ਼ਨੀਵਾਰ ਦੇਰ ਰਾਤ ਕਿਹਾ ਕਿ ਅਸੀਂ ਫਿਲਾਡੇਲਫੀਆ `ਚ ਭਾਰਤੀ ਨਾਗਰਿਕ ਅੰਸ਼ੁਲ ਕੁੰਚਾ ਦੇ ਕਤਲ ਤੋਂ ਬਹੁਤ ਦੁਖੀ ਹਾਂ । ਇਸ ਮੁਸ਼ਕਲ ਸਮੇਂ ਦੌਰਾਨ ਸਾਡੀ ਡੂੰਘੀ ਹਮਦਰਦੀ ਉਸ ਦੇ ਪਰਿਵਾਰ ਨਾਲ ਹੈ । ਕੌਂਸਲੇਟ ਅੰਸ਼ਲ ਦੇ ਪਰਿਵਾਰ ਦੇ ਸੰਪਰਕ `ਚ ਹੈ । ਉਨ੍ਹਾਂ ਨੂੰ ਹਰ ਸੰਭਵ ਮਦਦ ਪ੍ਰਦਾਨ ਕੀਤੀ ਜਾ ਰਹੀ ਹੈ ।

ਕੀ ਆਖਿਆ ਮ੍ਰਿਤਕ ਨੌਜਵਾਨ ਦੀ ਭੈਣ ਨੇ

ਮ੍ਰਿਤਕ ਦੀ ਭੈਣ ਤਨਵੀ ਨੇ ਕਿਹਾ ਕਿ ਅੰਸ਼ੁਲ (Anshul) ਉੱਤਰੀ ਫਿਲਾਡੇਲਫੀਆ `ਚ ਇਕ ਬਹੁ-ਰਾਸ਼ਟਰੀ ਕੰਪਨੀ `ਚ ਕੰਮ ਕਰਦਾ ਸੀ । ਵਾਧੂ ਆਮਦਨ ਲਈ ਵੀਕਐਂਡ `ਤੇ ਪੀਜ਼ਾ ਡਿਲੀਵਰ ਕਰਦਾ ਸੀ । ਸਾਨੂੰ ਦੱਸਿਆ ਗਿਆ ਕਿ ਅੰਸ਼ੁਲ ਦੇ ਸਿਰ `ਚ 3 ਵਾਰ ਗੋਲੀ ਮਾਰੀ (Shot) ਗਈ । ਉਸ ਨੂੰ ਸੜਕ `ਤੇ ਛੱਡ ਦਿੱਤਾ ਗਿਆ ਸੀ । ਅੰਸ਼ੁਲ ਨੂੰ ਪੀਜ਼ਾ ਦੇਣ ਲਈ ਇੱਕ ਸੁੰਨਸਾਨ ਇਲਾਕੇ `ਚ ਭੇਜਿਆ ਗਿਆ ਸੀ । ਬਾਅਦ `ਚ ਪਤਾ ਲੱਗਾ ਕਿ ਇਹ ਇਕ `ਧੋਖਾ` ਸੀ । ਅੰਸ਼ੁਲ ਦਾ ਕੋਈ ਵੀ ਸਾਮਾਨ ਚੋਰੀ ਨਹੀਂ ਕੀਤਾ ਗਿਆ ।