National
ਪਤੀ ਦੀ ‘ਪ੍ਰਾਪਰਟੀ` ਨਹੀਂ ਹੁੰਦੀ ਪਤਨੀ : ਉੜੀਸਾ ਹਾਈ ਕੋਰਟ
ਪਤੀ ਦੀ ‘ਪ੍ਰਾਪਰਟੀ` ਨਹੀਂ ਹੁੰਦੀ ਪਤਨੀ : ਉੜੀਸਾ ਹਾਈ ਕੋਰਟ
ਭੁਵਨੇਸ਼ਵਰ, 26 ਜੂਨ 2026 : ਭਾਰਤ ਦੇਸ਼ ਦੇ ਸੂਬੇ ਓੜੀਸਾ ਦੀ ਹਾਈਕੋਰਟ (Orissa High Court) ਨੇ ਬੀਤੇ ਦਿਨੀਂ ਆਪਣੇ ਇਕ ਫ਼ੈਸਲੇ ਵਿਚ ਇਕ ਅਹਿਮ ਗੱਲ ਸਪੱਸ਼ਟ ਕੀਤੇ ਜਾਣ ਦਾ ਸਮਾਚਾਰ ਹੈ ।
ਫੈਸਲੇ ਵਿਚ ਕੀ ਅਹਿਮ ਗੱਲ ਸਪੱਸ਼ਟ ਕੀਤੀ ਗਈ ਹੈ ਓੜੀਸਾ ਹਾਈਕੋਰਟ ਵਲੋਂ
ਉੜੀਸਾ ਹਾਈ ਕੋਰਟ ਨੇ ਵੀਰਵਾਰ ਨੂੰ ਆਪਣੇ ਇਕ ਫੈਸਲੇ ਵਿਚ ਸਪੱਸ਼ਟ ਕਰਦਿਆਂ ਕਿਹਾ ਕਿ ਪਤਨੀ ਪਤੀ ਦੀ ਪ੍ਰਾਪਰਟੀ ਨਹੀਂ ਹੁੰਦੀ ਅਤੇ ਬਾਲਗ ਔਰਤਾਂ ਇਹ ਤੈਅ ਕਰਨ ਲਈ ਪੂਰੀ ਤਰ੍ਹਾਂ ਆਜ਼ਾਦ ਹਨ ਕਿ ਉਨ੍ਹਾਂ ਨੇ ਕਿੱਥੇ ਰਹਿਣਾ ਹੈ । ਮੁੱਖ ਜੱਜ ਹਰੀਸ਼ ਟੰਡਨ ਅਤੇ ਜਸਟਿਸ ਮੁਰਾਰੀ ਰਮਨ ਦੀ ਬੈਂਚ ਨੇ ਇਕ ਮਾਮਲੇ ਦੀ ਸੁਣਵਾਈ ਦੌਰਾਨ ਪਾਇਆ ਕਿ ਔਰਤ ਵਿਆਹੁਤਾ ਜਿ਼ੰਦਗੀ ਵਿਚ ਅਣਬਣ ਕਾਰਨ ਆਪਣੀ ਮਰਜ਼ੀ ਨਾਲ ਸਹੁਰਾ ਘਰ ਛੱਡ ਕੇ ਚਲੀ ਗਈ ਸੀ ਅਤੇ ਉਸ ਨੂੰ ਕਿਸੇ ਵੀ ਤਰੀਕੇ ਨਾਲ ਗੈਰ-ਕਾਨੂੰਨੀ ਢੰਗ ਨਾਲ ਕੈਦ ਨਹੀਂ ਕੀਤਾ ਗਿਆ ਸੀ ।
ਪਟੀਸ਼ਨਕਰਤਾ ਨੇ ਖੁਦ ਜਾ ਕੇ ਕੀਤੀ ਸੀ ਪਤਨੀ ਨੂੰ ਵਾਪਸ ਆਉਣ ਦੀ ਬੇਨਤੀ
ਬੈਂਚ ਨੇ ਇਸ ਸਬੰਧੀ ਪਟੀਸ਼ਨ ਖਾਰਜ (Petition dismissed) ਕਰਦਿਆਂ ਕਿਹਾ ਕਿ ਇਹ ਮਾਮਲਾ ਇਸ ਗੱਲ ਦੀ ਇਕ ਵੱਡੀ ਮਿਸਾਲ ਹੈ ਕਿ ਮਾਮਲਾ ਦਰਜ ਕਰਨ ਵਾਲਿਆਂ ਵਿਚ ਨਿੱਜੀ ਹਿਸਾਬ-ਕਿਤਾਬ ਬਰਾਬਰ ਕਰਨ ਅਤੇ ਵਿਆਹੁਤਾ ਝਗੜਿਆਂ ਵਿਚ ਦਬਾਅ ਪਾਉਣ ਲਈ `ਹੇਬੀਅਸ ਕਾਰਪਸ` ਦੇ ਉਪਾਅ ਦੀ ਵਰਤੋਂ ਕਰਨ ਦਾ ਰੁਝਾਨ ਵਧ ਰਿਹਾ ਹੈ । ਬੈਂਚ ਨੇ ਕਿਹਾ, "ਇਹ ਉਨ੍ਹਾਂ ਮਿਸਾਲਾਂ ਵਿਚੋਂ ਇਕ ਹੈ ਜਿੱਥੇ ਪਤੀ ਨੇ ਅਦਾਲਤ ਰਾਹੀਂ ਪਤਨੀ `ਤੇ ਦਬਾਅ ਪਾਉਣ ਲਈ ਪਹੁੰਚ ਕੀਤੀ ਹੈ, ਜੋ ਵਿਆਹੁਤਾ ਰਿਸ਼ਤੇ ਵਿਚ ਅਣਬਣ ਕਾਰਨ ਆਪਣੀ ਮਰਜ਼ੀ ਨਾਲ ਘਰ ਛੱਡ ਕੇ ਚਲੀ ਗਈ ਸੀ । ਪਟੀਸ਼ਨਕਰਤਾ (Petitioner) ਖੁਦ ਉਸ ਵਿਅਕਤੀ ਦੇ ਘਰ ਗਿਆ ਸੀ, ਜਿਸ `ਤੇ ਉਸ ਨੇ ਆਪਣੀ ਪਤਨੀ ਨੂੰ ਅਗਵਾ ਕਰਨ ਦਾ ਦੋਸ਼ ਲਗਾਇਆ ਸੀ ਅਤੇ ਉਸ ਨੂੰ ਘਰ ਵਾਪਸ ਆਉਣ ਦੀ ਬੇਨਤੀ ਕੀਤੀ ਸੀ । ਹਾਲਾਂਕਿ ਔਰਤ ਨੇ ਪਤੀ ਨਾਲ ਜਾਣ ਤੋਂ ਮਨ੍ਹਾ ਕਰ ਦਿੱਤਾ ਸੀ ।
