ਤੇਲ ਵਾਲੀ ਪਾਈਪਲਾਈਨ ਨਾਲ ਛੇੜਖਾਨੀ ਕਰਨ ਵਾਲਿਆਂ ਬਾਰੇ ਜਾਣਕਾਰੀ ਸਾਂਝੀ ਕਰਨ ਵਾਲੇ ਨੂੰ ਇੰਡੀਅਨ ਆਇਲ ਦੇਵੇਗਾ ਇਨਾਮ

by Jasbeer Singh
October 7, 2024

ਤੇਲ ਵਾਲੀ ਪਾਈਪਲਾਈਨ ਨਾਲ ਛੇੜਖਾਨੀ ਕਰਨ ਵਾਲਿਆਂ ਬਾਰੇ ਜਾਣਕਾਰੀ ਸਾਂਝੀ ਕਰਨ ਵਾਲੇ ਨੂੰ ਇੰਡੀਅਨ ਆਇਲ ਦੇਵੇਗਾ ਇਨਾਮ ਸੰਗਰੂਰ, 7 ਅਕਤੂਬਰ : ਇੰਡੀਅਨ ਆਇਲ ਦੀ ਭੂਮੀਗਤ ਕਰਾਸ-ਕੰਟਰੀ ਪਾਈਪਲਾਈਨਾਂ ਬਹੁਤ ਜ਼ਿਆਦਾ ਜਲਣਸ਼ੀਲ ਪੈਟਰੋਲੀਅਮ ਉਤਪਾਦਾਂ ਨੂੰ ਲੈ ਕੇ ਜਾਂਦੀਆਂ ਹਨ ਅਤੇ ਬਹੁਤ ਉੱਚ ਦਬਾਅ 'ਤੇ ਕੰਮ ਕਰਦੀਆਂ ਹਨ, ਅਣਅਧਿਕਾਰਤ ਕਲੈਂਪ/ਵਾਲਵ ਨੂੰ ਜੋੜਕੇ ਪਾਈਪਲਾਈਨ ਨਾਲ ਛੇੜਛਾੜ ਅਤੇ ਤੇਲ ਦੀ ਚੋਰੀ ਨਾ ਸਿਰਫ ਕੀਮਤੀ ਰਾਸ਼ਟਰੀ ਸਰੋਤ ਨੂੰ ਨੁਕਸਾਨ ਪਹੁੰਚਾਉਂਦੀ ਹੈ ਬਲਕਿ ਇਹ ਵੱਡੇ ਪੱਧਰ ਦਾ ਖ਼ਤਰਾ ਵੀ ਪੈਦਾ ਕਰਦੀ ਹੈ । ਇੰਡੀਅਨ ਆਇਲ ਦੇ ਬੁਲਾਰੇ ਨੇ ਦੱਸਿਆ ਕਿ ਪੈਟਰੋਲੀਅਮ ਅਤੇ ਖਣਿਜ ਪਾਈਪਲਾਈਨਾਂ (ਰਾਹ ਦੇ ਅਧਿਕਾਰ ਦੀ ਪ੍ਰਾਪਤੀ) ਐਕਟ 1962 ਦੇ ਸੈਕਸ਼ਨ 15 ਅਤੇ 16 ਦੇ ਅਨੁਸਾਰ ਰਾਸ਼ਟਰੀ ਪਾਈਪਲਾਈਨ 'ਤੇ ਕਿਸੇ ਵੀ ਘੁਸਪੈਠ ਦੀ ਕੋਸ਼ਿਸ਼ ਇੱਕ ਗੰਭੀਰ ਅਪਰਾਧ ਹੈ। ਪਾਈਪਲਾਈਨਾਂ ਨੂੰ ਨੁਕਸਾਨ ਪਹੁੰਚਾਉਣ ਲਈ ਕੀਤੀ ਗਈ ਕੋਈ ਵੀ ਘੁਸਪੈਠ ਇੱਕ ਗੈਰ-ਜ਼ਮਾਨਤੀ ਅਪਰਾਧ ਹੈ, ਅਤੇ ਘੁਸਪੈਠੀਆਂ ਨੂੰ ਦਸ ਸਾਲ ਜਾਂ ਇਸ ਤੋਂ ਵੱਧ ਦੀ ਸਖ਼ਤ ਕੈਦ ਦੀ ਸਜ਼ਾ ਦਿੱਤੀ ਜਾ ਸਕਦੀ ਹੈ । ਪਾਈਪਲਾਈਨ ਵਿੱਚ ਗੈਰ-ਕਾਨੂੰਨੀ ਘੁਸਪੈਠ ਲਈ ਜਨਤਕ ਸੰਪੱਤੀ ਦੇ ਨੁਕਸਾਨ ਦੀ ਰੋਕਥਾਮ ਐਕਟ ਦੀ ਧਾਰਾ 3 ਅਤੇ 4, ਵਿਸਫੋਟਕ ਪਦਾਰਥ ਐਕਟ 1908 ਦੀ ਧਾਰਾ 3 ਅਤੇ 4, ਪੈਟਰੋਲੀਅਮ ਅਤੇ ਖਣਿਜ ਪਾਈਪਲਾਈਨ ਐਕਟ, 1962 (ਸੋਧਿਆ ਹੋਇਆ ਐਕਟ 2011) ਦੀ ਧਾਰਾ 15 ਅਤੇ 16, ਇੰਡੀਅਨ ਕੋਡ ਆਫ ਜਸਟਿਸ - ਧਾਰਾ 3 (5), 61, 62, 287, 303 (2), 317 (2), 324 (4), 324 (5) ਅਤੇ 324 (6) ਆਦਿ ਦੇ ਅਧੀਨ ਦੰਡਕਾਰੀ ਕਾਰਵਾਈ ਵੀ ਕੀਤੀ ਜਾ ਸਕਦੀ ਹੈ । ਬੁਲਾਰੇ ਨੇ ਦੱਸਿਆ ਕਿ ਇੰਡੀਅਨ ਆਇਲ ਨੇ ਪਾਈਪਲਾਈਨ ਨਾਲ ਛੇੜਛਾੜ ਦੀ ਜਾਣਕਾਰੀ ਦੇਣ ਵਾਲਿਆਂ ਲਈ ਇਨਾਮ ਸਕੀਮ ਲਾਗੂ ਕੀਤੀ ਗਈ ਹੈ। ਉਨ੍ਹਾਂ ਦੱਸਿਆ ਕਿ ਇਹ ਨਕਦ ਇਨਾਮ ਉਸ ਵਿਅਕਤੀ ਨੂੰ ਮਿਲਣਯੋਗ ਹੋਵੇਗੀ ਜਿਸ ਨੇ ਪਾਈਪਲਾਈਨ ਘੁਸਪੈਠ ਦੀ ਘਟਨਾ ਨੂੰ ਟਾਲਣ ਦੇ ਨਤੀਜੇ ਵਜੋਂ ਸਥਾਨਕ ਪੁਲਿਸ ਸਮੇਤ ਕਾਰਪੋਰੇਸ਼ਨ/ਸੁਰੱਖਿਆ ਏਜੰਸੀਆਂ ਨੂੰ ਮਾਮਲੇ ਦੀ ਤੁਰੰਤ ਰਿਪੋਰਟ ਕਰਨ ਵਿੱਚ ਸਰਗਰਮ ਭੂਮਿਕਾ ਨਿਭਾਈ ਹੋਵੇ। ਉਨ੍ਹਾਂ ਕਿਹਾ ਕਿ ਘੁਸਪੈਠੀਏ ਜਾਂ ਘੁਸਪੈਠ ਦੀ ਗਤੀਵਿਧੀ ਬਾਰੇ ਜਾਣਕਾਰੀ ਮੁਖਬਰ ਦੁਆਰਾ ਇੰਡੀਅਨ ਆਇਲ ਦੇ ਟੋਲ ਫ੍ਰੀ ਨੰਬਰ 18001801340 ਰਾਹੀਂ ਸਾਂਝੀ ਕੀਤੀ ਜਾ ਸਕਦੀ ਹੈ। ਉਨ੍ਹਾਂ ਕਿਹਾ ਕਿ ਜੇਕਰ ਸੂਹ ਦੇਣ ਵਾਲੇ ਦੀ ਇੱਛਾ ਹੋਵੇ ਤਾਂ ਅਜਿਹੀ ਕਿਸੇ ਵੀ ਗੈਰ-ਕਾਨੂੰਨੀ ਗਤੀਵਿਧੀ ਦੀ ਸੂਚਨਾ ਦੇਣ ਵਾਲੇ ਲੋਕਾਂ ਦੀ ਪਛਾਣ ਗੁਪਤ ਰੱਖੀ ਜਾਵੇਗੀ । ਬੁਲਾਰੇ ਨੇ ਪਾਈਪਲਾਈਨਾਂ ਦੇ ਨੇੜਲੇ ਖੇਤਰਾਂ ਵਿੱਚ ਰਹਿਣ ਵਾਲੇ ਨਾਗਰਿਕਾਂ ਨੂੰ ਸੁਚੇਤ ਰਹਿਣ ਅਤੇ ਕਿਸੇ ਵੀ ਸ਼ੱਕੀ ਗਤੀਵਿਧੀ ਦੀ ਸੂਚਨਾ ਇੰਡੀਅਨ ਆਇਲ ਜਾਂ ਸਥਾਨਕ ਪੁਲਿਸ ਅਧਿਕਾਰੀਆਂ ਨੂੰ ਦੇਣ ਦੀ ਅਪੀਲ ਕੀਤੀ ।