‘ਸ਼ਾਦੀ ਡਾਟ ਕਾਮ` ਦੇ ਸੰਸਥਾਪਕ ਨੂੰ ਸੁਪਰੀਮ ਕੋਰਟ ਤੋਂ ਰਾਹਤ

by Jasbeer Singh
February 4, 2026

‘ਸ਼ਾਦੀ ਡਾਟ ਕਾਮ` ਦੇ ਸੰਸਥਾਪਕ ਨੂੰ ਸੁਪਰੀਮ ਕੋਰਟ ਤੋਂ ਰਾਹਤ ਨਵੀਂ ਦਿੱਲੀ, 4 ਫਰਵਰੀ 2026 : ਸੁਪਰੀਮ ਕੋਰਟ ਨੇ `ਸ਼ਾਦੀ ਡਾਟ ਕਾਮ` ਦੇ ਸੰਸਥਾਪਕ ਅਨੁਪਮ ਮਿੱਤਲ ਅਤੇ 2 ਹੋਰਾਂ ਨੂੰ ਉਸ ਮਾਮਲੇ `ਚ ਇਕ ਬਹੁਤ ਵੱਡੀ ਰਾਹਤ ਪ੍ਰਦਾਨ ਕਰ ਦਿੱਤੀ ਹੈ। ਜੋ ਇਸ ਵੈੱਬਸਾਈਟ ਦੇ ਇਕ ਖਪਤਕਾਰ ਵੱਲੋਂ ਕਥਿਤ ਧੋਖਾਦੇਹੀ ਕੀਤੇ ਜਾਣ ਨਾਲ ਸਬੰਧਤ ਹੈ। ਧੋਖਾਦੇਹੀ ਮਾਮਲੇ `ਚ ਗ੍ਰਿਫਤਾਰੀ `ਤੇ 2 ਹਫ਼ਤੇ ਲਈ ਰੋਕ ਮਾਨਯੋਗ ਕੋਰਟ ਨੇ ਸ਼ਾਦੀ ਡਾਟ ਕਾਮ ਦੇ ਸੰਸਥਾਪਕ ਨੂੰ ਜੋ ਰਾਹਤ ਪ੍ਰਦਾਨ ਕੀਤੀ ਹੈ ਉਹ ਦੋ ਹਫ਼ਤਿਆਂ ਲਈ ਗ੍ਰਿਫ਼ਤਾਰੀ ਤੇ ਰੋਕ ਹੈ। ਜਸਟਿਸ ਪ੍ਰਸ਼ਾਂਤ ਕੁਮਾਰ ਮਿਸ਼ਰਾ ਅਤੇ ਜਸਟਿਸ ਐੱਨ. ਵੀ ਅੰਜਾਰੀਆ ਦੀ ਬੈਂਚ ਨੇ ਤੇਲੰਗਾਨਾ ਹਾਈ ਕੋਰਟ ਦੇ ਉਸ ਹੁਕਮ ਨੂੰ ਰੱਦ ਕਰ ਦਿੱਤਾ, ਜਿਸ `ਚ ਮਿੱਤਲ ਦੇ ਖ਼ਿਲਾਫ ਕਾਰਵਾਈ ਨੂੰ ਰੱਦ ਕਰਨ ਤੋਂ ਇਨਕਾਰ ਕਰ ਦਿੱਤਾ ਗਿਆ ਸੀ ਅਤੇ ਮਾਮਲੇ ਨੂੰ ਨਵੇਂ ਸਿਰੇ ਤੋਂ ਵਿਚਾਰ ਕਰਨ ਲਈ ਹਾਈ ਕੋਰਟ ਦੇ ਕੋਲ ਵਾਪਸ ਭੇਜ ਦਿੱਤਾ । ਇਹ ਮਾਮਲਾ ਹੈਦਰਾਬਾਦ ਦੀ ਇਕ ਔਰਤ ਦੇ ਇਸ ਦੋਸ਼ ਨਾਲ ਸਬੰਧਤ ਹੈ ਕਿ `ਸ਼ਾਦੀ ਡਾਟ ਕਾਮ` `ਤੇ ਫਰਜ਼ੀ `ਪ੍ਰੋਫਾਈਲ` (ਨਿੱਜੀ ਵੇਰਵੇ) ਦੀ ਵਰਤੋਂ ਕਰਨ ਵਾਲੇ ਇਕ ਸ਼ਖਸ ਨੇ ਉਸ ਨਾਲ 11 ਲੱਖ ਰੁਪਏ ਦੀ ਧੋਖਾਦੇਹੀ ਕੀਤੀ ਅਤੇ ਵੈੱਬਸਾਈਟ ਉਕਤ ਖਪਤਕਾਰ ਦੇ ਵੇਰਵਿਆਂ ਦੀ ਠੀਕ ਤਰ੍ਹਾਂ ਜਾਂਚ ਕਰਨ `ਚ ਨਾਕਾਮ ਰਹੀ।