Shashank Singh IPL 2024: ਜਿਸ ਖਿਡਾਰੀ ਨੂੰ Punjab Kings ਨੇ ਗਲਤੀ ਨਾਲ ਖਰੀਦਿਆ, ਉਸੇ ਨੇ ਜਿੱਤਵਾਇਆ ਮੈਚ

by Jasbeer Singh
April 5, 2024

Shashank Singh, IPL 2024, GT vs PBKS: ਪੰਜਾਬ ਕਿੰਗਜ਼ (PBKS) ਨੇ ਇੰਡੀਅਨ ਪ੍ਰੀਮੀਅਰ ਲੀਗ 2024 (IPL 2024) ਦੇ ਮੈਚ ਨੰਬਰ 17 ਵਿੱਚ ਆਖਰੀ ਓਵਰ ਵਿੱਚ ਗੁਜਰਾਤ ਟਾਈਟਨਸ ਤੋਂ ਜਿੱਤ ਖੋਹ ਲਈ। ਪੰਜਾਬ ਨੇ IPL ਦਾ ਇਹ ਰੋਮਾਂਚਕ ਮੈਚ 1 ਗੇਂਦ ਬਾਕੀ ਰਹਿੰਦਿਆਂ 3 ਵਿਕਟਾਂ ਨਾਲ ਜਿੱਤ ਲਿਆ। ਹਾਲਾਂਕਿ ਪੰਜਾਬ ਦੀ ਜਿੱਤ ਦਾ ਸਭ ਤੋਂ ਵੱਡਾ ਹੀਰੋ 32 ਸਾਲਾ ਸ਼ਸ਼ਾਂਕ ਸਿੰਘ ਰਿਹਾ। ਸ਼ਸ਼ਾਂਕ ਨੇ 29 ਗੇਂਦਾਂ ਤੇ 61 ਦੌੜਾਂ ਦੀ ਜ਼ਬਰਦਸਤ ਪਾਰੀ ਖੇਡੀ ਅਤੇ ਮੈਚ ਦਾ ਰੁਖ ਹੀ ਬਦਲ ਦਿੱਤਾ। ਸ਼ਸ਼ਾਂਕ ਨੇ ਇੰਪੈਕਟ ਪਲੇਅਰ ਆਸ਼ੂਤੋਸ਼ ਸ਼ਰਮਾ ਨਾਲ 43 ਦੌੜਾਂ ਦੀ ਸ਼ਾਨਦਾਰ ਸਾਂਝੇਦਾਰੀ ਕੀਤੀ। 4 ਅਪ੍ਰੈਲ ਨੂੰ ਗੁਜਰਾਤ ਦੇ ਖਿਲਾਫ ਪੰਜਾਬ ਲਈ ਮੈਚ ਵਿਨਰ ਬਣੇ ਸ਼ਸ਼ਾਂਕ ਬਾਰੇ ਜਾਣਨ ਤੋਂ ਪਹਿਲਾਂ, ਸਾਨੂੰ ਥੋੜਾ ਜਿਹਾ ਦਸੰਬਰ 2023 ਵਿੱਚ ਜਾਣਾ ਪਵੇਗਾ, ਜਦੋਂ ਆਈਪੀਐਲ 2024 ਲਈ ਮਿੰਨੀ ਨਿਲਾਮੀ ਦੁਬਈ ਵਿੱਚ ਹੋਈ ਸੀ। ਪੰਜਾਬ ਕਿੰਗਜ਼ ਨੇ ਅਨਕੈਪਡ ਸ਼ਸ਼ਾਂਕ ਸਿੰਘ ਨੂੰ 20 ਲੱਖ ਰੁਪਏ ਵਿੱਚ ਸ਼ਾਮਲ ਕੀਤਾ। ਪਰ ਇਸ ਤੋਂ ਬਾਅਦ ਵਿਵਾਦ ਖੜ੍ਹਾ ਹੋ ਗਿਆ ਕਿ ਉਸ ਨੂੰ ਪ੍ਰੀਤੀ ਜ਼ਿੰਟਾ ਦੀ ਟੀਮ ਨੇ ਗਲਤੀ ਕਰਕੇ ਖਰੀਦ ਲਿਆ। ਹਾਲਾਂਕਿ ਬਾਅਦ ਚ ਸਪੱਸ਼ਟ ਕੀਤਾ ਗਿਆ ਕਿ ਅਜਿਹਾ ਕੁਝ ਨਹੀਂ ਸੀ। ਹਾਲਾਂਕਿ ਇਹ ਉਹੀ ਸ਼ਸ਼ਾਂਕ ਸਿੰਘ ਹੈ, ਜਿਸ ਨੂੰ ਪੰਜਾਬ ਕਿੰਗਜ਼ ਟੀਮ ਨੇ ਕਥਿਤ ਤੌਰ ਤੇ ਕਿਹਾ ਸੀ ਕਿ ਉਨ੍ਹਾਂ ਨੇ ਗਲਤੀ ਨਾਲ ਖਰੀਦਿਆ ਸੀ। ਕੁੱਲ ਮਿਲਾ ਕੇ ਸ਼ਸ਼ਾਂਕ ਨੂੰ ਨਿਲਾਮੀ ਵਿੱਚ ਖਰੀਦ ਕੇ ਇੱਕ ਤਰ੍ਹਾਂ ਨਾਲ ਬੇਇੱਜ਼ਤ ਕੀਤਾ ਗਿਆ ਸੀ, ਹੁਣ ਉਸੇ ਸ਼ਸ਼ਾਂਕ ਨੇ ਪੰਜਾਬ ਦੀ ਇੱਜ਼ਤ ਬਚਾਈ ਹੈ।ਸ਼ਸ਼ਾਂਕ ਨੇ ਅਹਿਮਦਾਬਾਦ ਚ ਖੇਡੇ ਗਏ ਮੈਚ ਚ 61 ਦੌੜਾਂ ਦੀ ਆਪਣੀ ਪਾਰੀ ਦੌਰਾਨ 6 ਚੌਕੇ ਅਤੇ 4 ਛੱਕੇ ਲਗਾਏ। ਸ਼ਸ਼ਾਂਕ ਨੇ ਇੰਪੈਕਟ ਪਲੇਅਰ ਆਸ਼ੂਤੋਸ਼ ਸ਼ਰਮਾ ਨਾਲ ਮਿਲ ਕੇ ਸ਼ਾਨਦਾਰ ਬੱਲੇਬਾਜ਼ੀ ਕੀਤੀ ਅਤੇ ਗੁਜਰਾਤ ਦੇ ਜਬਾੜੇ ਤੋਂ ਮੈਚ ਖੋਹ ਲਿਆ। ਇਸ ਤਰ੍ਹਾਂ ਪੰਜਾਬ 4 ਚੋਂ 2 ਮੈਚ ਜਿੱਤ ਕੇ IPL ਅੰਕ ਸੂਚੀ ਚ ਵੀ ਪੰਜਵੇਂ ਸਥਾਨ ਤੇ ਪਹੁੰਚ ਗਿਆ ਹੈ। 25 ਸਾਲਾ ਆਸ਼ੂਤੋਸ਼ ਵੀ ਸ਼ਸ਼ਾਂਕ ਵਾਂਗ ਅਨਕੈਪਡ ਖਿਡਾਰੀ ਹੈ। ਆਖ਼ਰੀ ਓਵਰ ਵਿੱਚ ਕੀ ਹੋਇਆ? ਪੰਜਾਬ ਨੂੰ ਆਖਰੀ ਓਵਰ ਵਿੱਚ 7 ਦੌੜਾਂ ਦੀ ਲੋੜ ਸੀ। ਇਸ ਤੋਂ ਬਾਅਦ ਗੁਜਰਾਤ ਟਾਈਟਨਜ਼ ਦੇ ਕਪਤਾਨ ਸ਼ੁਭਮਨ ਗਿੱਲ ਨੇ ਦਰਸ਼ਨ ਨਲਕੰਦੇ ਨੂੰ ਗੇਂਦ ਸੌਂਪੀ, ਉਸ ਓਵਰ ਵਿੱਚ ਆਸ਼ੂਤੋਸ਼ ਸ਼ਰਮਾ ਪਹਿਲੀ ਹੀ ਗੇਂਦ ’ਤੇ ਆਊਟ ਹੋ ਗਏ। ਇਸ ਤੋਂ ਬਾਅਦ ਦਰਸ਼ਨ ਨੇ ਵਾਈਡ ਗੇਂਦ ਸੁੱਟੀ। ਇਸ ਤੋਂ ਬਾਅਦ ਪੰਜ ਗੇਂਦਾਂ ਤੇ ਛੇ ਦੌੜਾਂ ਬਣਾਉਣੀਆਂ ਪਈਆਂ। ਓਵਰ ਦੀ ਦੂਜੀ ਗੇਂਦ ਤੇ ਹਰਪ੍ਰੀਤ ਬਰਾੜ ਕੋਈ ਦੌੜਾਂ ਨਹੀਂ ਬਣਾ ਸਕਿਆ। ਫਿਰ ਅਗਲੀ ਗੇਂਦ ਤੇ ਇਕ ਦੌੜ ਲੈ ਕੇ ਸ਼ਸ਼ਾਂਕ ਸਿੰਘ ਨੂੰ ਸਟ੍ਰਾਈਕ ਦਿੱਤੀ। ਸ਼ਸ਼ਾਂਕ ਸਿੰਘ ਨੇ ਓਵਰ ਦੀ ਚੌਥੀ ਗੇਂਦ ਤੇ ਚੌਕਾ ਜੜਿਆ। ਫਿਰ ਆਖਰੀ ਗੇਂਦ ਤੇ ਸ਼ਸ਼ਾਂਕ ਨੇ ਲੈਗ ਬਾਈ ਦੀ ਦੌੜ ਲੈ ਕੇ ਜਿੱਤ ਪੱਕੀ ਕਰ ਲਈ।