ਛਤਰਪਤੀ ਸਿ਼ਵਾਜੀ ਮਹਾਰਾਜ ਦੀ ਮੂਰਤੀ ਦੇ ਮੂਰਤੀਕਾਰ ਜੈਦੀਪ ਆਪਟੇ ਨੂੰ ਪੁਲਸ ਨੇ ਕੀਤਾ ਕਲਿਆਣ ਵਿਚ ਗ੍ਰਿਫ਼ਤਾਰ

by Jasbeer Singh
September 5, 2024

ਛਤਰਪਤੀ ਸਿ਼ਵਾਜੀ ਮਹਾਰਾਜ ਦੀ ਮੂਰਤੀ ਦੇ ਮੂਰਤੀਕਾਰ ਜੈਦੀਪ ਆਪਟੇ ਨੂੰ ਪੁਲਸ ਨੇ ਕੀਤਾ ਕਲਿਆਣ ਵਿਚ ਗ੍ਰਿਫ਼ਤਾਰ ਮਹਾਰਾਸ਼ਟਰ : ਮਹਾਰਾਸ਼ਟਰ ਦੇ ਰਾਜਕੋਟ ਕਿਲ੍ਹੇ ਵਿਚ ਹਾਲ ਹੀ ਵਿਚ ਢਹਿ ਗਈ ਛਤਰਪਤੀ ਸਿ਼ਵਾਜੀ ਮਹਾਰਾਜ ਦੀ ਮੂਰਤੀ ਦੇ ਮੂਰਤੀਕਾਰ ਜੈਦੀਪ ਆਪਟੇ ਨੂੰ ਪੁਲਸ ਨੇ ਬੁੱਧਵਾਰ ਨੂੰ ਕਲਿਆਣ ਵਿਚ ਗ੍ਰਿਫ਼ਤਾਰ ਕਰ ਲਿਆ। ਸੂਤਰਾਂ ਮੁਤਾਬਕ ਆਪਟੇ ਨੂੰ ਫਿਲਹਾਲ ਡਿਪਟੀ ਕਮਿਸ਼ਨਰ ਆਫ ਪੁਲਸ (ਡੀਸੀਪੀ) ਦੇ ਦਫ਼ਤਰ ਵਿਚ ਹਿਰਾਸਤ ਵਿਚ ਰੱਖਿਆ ਗਿਆ ਹੈ। ਕਲਿਆਣ ਦੇ ਰਹਿਣ ਵਾਲੇ 24 ਸਾਲਾ ਮੂਰਤੀਕਾਰ ਨੂੰ 26 ਅਗਸਤ ਨੂੰ 35 ਫੁੱਟ ਉੱਚੀ ਛਤਰਪਤੀ ਸ਼ਿਵਾਜੀ ਮਹਾਰਾਜ ਦੀ ਮੂਰਤੀ ਦੇ ਢਹਿ ਜਾਣ ਤੋਂ ਬਾਅਦ ਕਰੀਬ 10 ਦਿਨ ਲਾਪਤਾ ਹੋਣ ਤੋਂ ਬਾਅਦ ਗ੍ਰਿਫਤਾਰ ਕੀਤਾ ਗਿਆ ਸੀ। ਜ਼ਿਕਰਯੋਗ ਹੈ ਕਿ ਆਪਟੇ, ਜੋ ਕਲਿਆਣ ਵਿਚ ਇਕ ਆਰਟ ਕੰਪਨੀ ਦੇ ਮਾਲਕ ਹਨ, ਨੂੰ ਵੱਡੀਆਂ ਮੂਰਤੀਆਂ ਬਣਾਉਣ ਦਾ ਪਹਿਲਾਂ ਕੋਈ ਤਜਰਬਾ ਨਹੀਂ ਹੈ, ਪਰ ਉਨ੍ਹਾਂ ਨੇ ਸਿੰਧੂਦੁਰਗ ਦੇ ਮਾਲਵਾਨ ਵਿਚ ਰਾਜਕੋਟ ਕਿਲ੍ਹੇ ਵਿਚ ਸ਼ਿਵਾਜੀ ਮਹਾਰਾਜ ਦੀ ਮੂਰਤੀ `ਤੇ ਕੰਮ ਕੀਤਾ ਸੀ, ਜਿਸ ਦਾ ਉਦਘਾਟਨ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਪਿਛਲੇ ਸਾਲ ਦਸੰਬਰ ਵਿਚ ਕੀਤਾ ਸੀ। ਮਹਾਰਾਸ਼ਟਰ ਪੁਲਸ ਨੇ ਆਪਟੇ ਅਤੇ ਢਾਂਚਾਗਤ ਸਲਾਹਕਾਰ ਚੇਤਨ ਪਾਟਿਲ ਖਿਲਾਫ ਭਾਰਤੀ ਨਿਆਂ ਸੰਹਿਤਾ (ਬੀਐੱਨਐੱਸ) ਦੀਆਂ ਵੱਖ-ਵੱਖ ਧਾਰਾਵਾਂ ਦੇ ਤਹਿਤ ਐੱਫਆਈਆਰ ਦਰਜ ਕਰਨ ਦੇ ਨਾਲ ਵਿਸ਼ਾਲ ਮੂਰਤੀ ਦੇ ਅਚਾਨਕ ਢਹਿ ਜਾਣ ਨੂੰ ਲੈ ਕੇ ਸਿਆਸਤ ਗਰਮਾ ਗਈ। ਪਾਟਿਲ ਨੂੰ 31 ਅਗਸਤ ਨੂੰ ਗ੍ਰਿਫਤਾਰ ਕੀਤਾ ਗਿਆ ਸੀ, ਜਦੋਂਕਿ ਆਪਟੇ ਖਿਲਾਫ ਲੁੱਕਆਊਟ ਸਰਕੂਲਰ ਜਾਰੀ ਕੀਤਾ ਗਿਆ ਸੀ। ਵਿਰੋਧੀ ਧਿਰ ਦੇ ਨੇਤਾਵਾਂ ਨੇ ਇਸ ਗੱਲ `ਤੇ ਇਤਰਾਜ਼ ਜਤਾਇਆ ਕਿ ਇੰਨੇ ਵੱਡੇ ਢਾਂਚੇ ਨੂੰ ਬਣਾਉਣ ਦੇ ਅਨੁਭਵ ਦੀ ਘਾਟ ਦੇ ਬਾਵਜੂਦ ਆਪਟੇ ਨੂੰ ਇੰਨਾ ਮਹੱਤਵਪੂਰਨ ਠੇਕਾ ਕਿਵੇਂ ਦਿੱਤਾ ਗਿਆ।